Dagoeneko baliabide asko dago eskuragarri irakasgai honetako gaiak garatzeko. Lan honetan, beste lerrabide bat eskaini nahi dugu, ikerketan oinarritutako ikasketa (Inquiry based learning) bultzatuz, baina irakaslearen gidaritzapean uneoro, aurkikuntza hutsaren bidezko ikasketaren ikuspegi bakuna alde batera utzita, eta argudiatzea eta pentsamendu kritikoa bultzatuko duten jardueretan arreta jarrita.
Oso garrantzitsua da azpimarratzea oinarrizko ezagutza ezinbestekoa dela ikerketan oinarritutako erronka bati heltzeko. Ikerketa-jarduerak eskatzen duen pentsamendua (hipotesiak egitea, esperimentazioa planifikatzea, emaitzak interpretatzea, ondorioak argudiatzea, etab.) ezin da gauzatu aldez aurretik behar diren ezagutzak izan gabe. Ezagutzak aktiboki eraikitze horretan, erronka bidezko ikasketa-teknikek ikaskuntza sakona eragin ahal izan dezaten, irakasleen lana ere beharrezkoa da (zuzeneko heziketa, kontzeptuen azalpena, adibideak, orientazioak, trebakuntza, etab.).
Edukien bloke honetarako proposatutako atazak eta jarduerak honako hauek dira:
Sukaldeko kimika
Ikasleek materia-sistemak identifikatu eta sailkatu, argazkiak atera eta taldean landu behar dituzte. 2 saio.
Koloideak
Jarduera ludiko honetan betiko “Flip Cardsak” erabiltzen dira, koloideen sailkapena indartzeko eta errepasatzeko. 1/2 saio.
Lapurtutako pastela
Ikasleek detektibe-lana egiten dute: polizia-kasu bat dute esku artean, eta lagin batzuk analizatu behar dituzte. Horretarako, nahasketak banantzeko metodoez ikasi dutena erabili beharko dute. 5 saio.
Lurzoruaren detektibeak
Ikasleek, ingeniariak bailiran, lan esperimental erraz bat egin behar dute, eta lortutako datuekin, txosten bat idatzi behar dute eraikuntza-konpainia batentzat. 2 saio.
Estortsio-delitua
Estortsio-delitu baten erruduna nor den aurkitu behar dute. Tintak erabiliz egingo dute lan esperimental hau. 2 saio.
Kakaorik onena
Ikasleek kakaorik onena zein den ikertzen eta erabakitzen dute. Horretarako, kontzentrazio kimiko batzuk analizatu eta kimikoki prestatu, eta, azkenean, guztien artean dastaketa bat egiten dute. 2 saio.
Mediterranioko misterioa
Disoluzioei eta kontzentrazioei buruz dakitena aplikatuz, ikasleek ikertu behar dute Mediterraneoak zergatik ez duen gora egiten, nahiz eta, itxuraz, ez daukan irteerarik eta ura hartu besterik ez duen egiten ibaietatik eta Atlantikotik. 2 saio.
Homeopatia
Iker dezagun nola egiten diren homeopatia-diluzioak; gainera, haien kontzentrazioari buruzko galdera batzuk izango ditugu ebazteko. 2 saio.
Luparik gabeko kimika
Laborategiko esperimentazioa baliatuko dugu testuinguru akademikoa eraikitzeko. Egunero-eguneroko erreakzio kimiko erraz batzuetan zer gertatzen den ikusiz, aldaketa fisikoak eta kimikoak bereizi nahi dira. 3 saio.
Ogia
PISAtik askatuta dator item hau. Bertan, aldaketa fisiko eta kimikoaren kontzeptuak laburbiltzen dira, benetako egoera bati aplikatuta. Saio bat.
Ezpain-distira
Pisatik askatutako item honetan materiaren propietateak, disoluzioak eta dentsitatea lantzen dira. Saio bat.
11 erronka izango ditugu, 25 saiotan burutzeko. Hala ere, jarduera horietako batzuk ikasturtean zehar egin daitezke, beste gai batzuekin loturik. Batzuek, gainera, 4. DBHko Kultura Zientifikoko arlorako balio dute.